Nonaginta dies et quattuor ac medium sol
Conficit, a tropico in tropicum dum permeat astrum,
Octipedem in Cancrum Phrixeo ab Ariete pergens.
Hoc spatio aestiui pulsusque et meta diei.
5
Semidiemque duosque dies deciesque nouenos
A Cancro in Chelas aequatae tempora noctis
Atque dii cursu peragit sol aureus alto,
Autumni aestatisque simul confinia miscens.
Vnde autumnales transcurrens ordine menses
10
Ad tropicum pergit signum gelidi Capricorni,
Octo dies decies octonis insuper addens
Quadrantemque diei quinto qui protinus anno
Mense Numae extremo nomen capit embolimaei.
Inde ad Agenorei festinans cornua Tauri,
15
Scandit Lanigeri tropicum sol aureus astrum,
Nonaginta dies decreto fine coercens.
Hic tibi circus erit semper uertentibus annis
Ter centum ac senis decies et quinque diebus.
ratio dierum anni uertentis V
codex unicus
V = Leiden, Bibliotheek der Rijksuniversiteit, VLF 111 (saec. IX)