Quoteni dies sint mensuum singulorum
Implent tricenas per singula menstrua luces
Iunius Aprilisque et cum Septembre Nouember.
Vnum ter denis cumulatius adde diebus
Per septem menses, Iani Martisque kalendis
5
Et quas Maius agit, quas Iulius Augustusque
Et quas October positusque in fine December.
Vnus erit tantum duodetriginta dierum,
Quem Numa praeposito uoluit succedere Iano.
Sic ter centenis decies accedere senos
10
Quadrantemque et quinque dies sibi computat annus.