Thermarum in solio si quis Polygitona uidit
Vlcera membrorum scabie putrefacta fouentem,
Praeposuit cunctis spectacula talia ludis.
Principio tremulis gannitibus aera pulsat
5
Verbaque lasciuos meretricum imitantia coetus
Vibrat et obscenae numeros pruriginis implet.
Bracchia deinde rotat uelut enthea daemone Maenas:
Pectus crura latus uentrem femora inguina suras
Tergum colla umeros luteae symplegadis antrum,
10
Tam diuersa locis uaga carnificina pererrat,
Donec marcentem calidi feruore lauacri
Blandus letali soluat dulcedine morbus.
Desectos sic fama uiros, ubi cassa libido
Femineos coetus et non sua bella lacessit,
15
Irrita uexato consumere gaudia lecto,
Titillata breui cum iam sub fine uoluptas
Feruet et ingesto peragit ludibria morsu.
Turpia non aliter Polygiton membra resoluit
Et, quia debentur suprema piacula uitae,
20
Ad Phlegethonteas sese iam praeparat undas.
in scabiosum Polygitonem T
in Polygitonum qui multa scabie vexatur C
codices
C = Padova, Biblioteca Capitolare C. 64 (saec. XV)
K = London, British Library, Kings 31 (1475)
M = Firenze, Biblioteca Nazionale Centrale, Magl. VI.29 (saec. XIV)
L = Firenze, Biblioteca Medicea Laurenziana, Plut. 51.13 (1490-1500)
T = Leiden, Bibliotheek der Rijksuniversiteit, VLQ 107 (saec. XV-XVI)
Z = consensus C K M (L) T
hoc carmen etiam in I et b extat