Ausonius commemoratio professorum Burdigalensium 16 = XVI.17 Schenkl = V.16 Peiper = IV.16 Prete = VI.2.16 Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


Aemilius Magnus Arborius rhetor Tolosae

 

Inter cognatos iam fletus, auuncule, manes,

      Inter rhetoricos nunc memorandus eris.

Illud opus pietas, istud reuerenda uirorum

      Nomina pro patriae religione habeant.

5

Bis meritum duplici celebremus honore parentem

     Arborium, Arborio patre et auo Argicio.

Stemma tibi patris Aeduici, Tarbellica Maurae

      Matris origo fuit; ambo genus procerum.

Nobilis et dotata uxor, domus et schola, cultae

10

      Principum amicitiae contigerunt iuueni,

Dum Constantini fratres opulenta Tolosa

     Exilii specie sepositos cohibet.

Byzanti inde arcem Thressaeque Propontidis urbem

      Constantinopolim fama tui pepulit.

15

Illic diues opum doctoque ibi Caesare honorus

      Occumbis patribus, Magne, superstitibus.

In patriam sed te sedem ac monumenta tuorum

      Principis Augusti restituit pietas.

Hinc renouat causam lacrimis et flebile munus

20

      Annuus ingrata religione dies.

Aemilius Magnus Arborius rhetor Tolosae Charpin, Scaliger

codex unicus
V = Leiden, Bibliotheek der Rijksuniversiteit, VLF 111 (saec. IX)

carmina 16-22 in V, folio 12 abrepto, desunt; editiones antiquiores (Charpin, Vinet, Scaliger) codicum instar habendae sunt. Tantum carmina 20,7-14 et 25,7-10 extant in v = Wien, Österreichische Nationalbibliothek, lat. 3261 (saec. XVI) et s = Leiden, Bibliotheek der Rijksuniversiteit, Opera 754 F 9