Grammaticis Graecis Burdigalensibus
Romulum post hos prius an Corinthi,
Anne Sperchei pariterque nati
Atticas Musas memorem Menesthei
Grammaticorum?
5
Sedulum cunctis studium docendi,
Fructus exilis tenuisque sermo,
Sed, quia nostro docuere in aeuo,
Commemorandi.
Tertius horum mihi non magister;
10
Ceteri primis docuere in annis,
Ne forem uocum rudis aut loquendi,
Obstitit nostrae quia, credo, mentis
Tardior sensus neque disciplinis
15
Appulit Graecis puerilis aeui
Noxius error.
Vos leuis caespes tegat et sepulchri
Tecta defendant cineres opertos
Ac meae uocis titulus supremum
20
Reddat honorem.
Grammaticis Graecis Burdigalensibus V
metro saffico V mg.
codex unicus
V = Leiden, Bibliotheek der Rijksuniversiteit, VLF 111 (saec. IX)
carmina 16-22 in V, folio 12 abrepto, desunt; editiones antiquiores (Charpin, Vinet, Scaliger) codicum instar habendae sunt. Tantum carmina 20,7-14 et 25,7-10 extant in v = Wien, Österreichische Nationalbibliothek, lat. 3261 (saec. XVI) et s = Leiden, Bibliotheek der Rijksuniversiteit, Opera 754 F 9