Ausonius commemoratio professorum Burdigalensium 5 = XVI.6 Schenkl = V.5 Peiper = IV.5 Prete = VI.2.5 Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


Attius Tiro Delphidius rhetor

 

Facunde, docte, lingua et ingenio celer,

Iocis amoene, Delphidi,

Subtextus esto flebili threno patris,

Laudi ut subibas aemulus.

5

Tu paene ab ipsis orsus incunabulis

Dei poeta nobilis,

Sertum coronae praeferens Olympiae,

Puer celebrasti Iouem.

Mox inde cursim more torrentis freti

10

Epos ligasti metricum,

Vt nullus aeque lege liber carminum

Orationem texeret.

Celebrata uarie cuius eloquentia

Domi forisque claruit

15

Seu tu cohortis praesulem praetoriae

Prouinciarum aut iudices

Coleres, tuendis additus clientibus

Famae et salutis sauciis.

Felix, quietis si maneres litteris,

20

Opus Camenarum colens,

Nec odia magnis concitata litibus

Armaret ultor impetus,

Nec inquieto temporis tyrannici

Palatio te attolleres.

25

Dum spem remotam semper arcessis tibi,

Fastidiosus obuiae,

Tuumque mauis esse quam fati bonum,

Desiderasti plurima,

Vagus per omnes dignitatum formulas

30

Meritusque plura quam gerens.

Vnde insecuto criminum motu graui

Donatus aerumnis patris,

Mox inde rhetor, nec docendi pertinax,

Curam fefellisti patrum;

35

Minus malorum munere expertus dei,

Medio quod aeui raptus es,

Errore quod non deuiantis filiae

Poenaque laesus coniugis.

Attius Scaliger

Atticus V

codex unicus
V = Leiden, Bibliotheek der Rijksuniversiteit, VLF 111 (saec. IX)

carmina 16-22 in V, folio 12 abrepto, desunt; editiones antiquiores (Charpin, Vinet, Scaliger) codicum instar habendae sunt. Tantum carmina 20,7-14 et 25,7-10 extant in v = Wien, Österreichische Nationalbibliothek, lat. 3261 (saec. XVI) et s = Leiden, Bibliotheek der Rijksuniversiteit, Opera 754 F 9