Ausonius commemoratio professorum Burdigalensium 4 = XVI.5 Schenkl = V.4 Peiper = IV.4 Prete = VI.2.4 Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


Attius Patera pater rhetor

 

Aetate quamquam uiceris dictos prius,

Patera, fandi nobilis,

Tamen quod aeuo floruisti proximo

Iuuenisque te uidi senem,

5

Honore maestae non carebis neniae,

Doctor potentum rhetorum.

Tu Baiocassi stirpe Druidarum satus,

Si fama non fallit fidem,

Beleni sacratum ducis e templo genus

10

Et inde uobis nomina:

Tibi Paterae - sic ministros nuncupant

Apollinares mystici;

Fratri patrique nomen a Phoebo datum

Natoque de Delphis tuo.

15

Doctrina nulli tanta in illo tempore

Cursusque tot fandi et rotae;

Memor, disertus, lucida facundia,

Canore, cultu praeditus,

Salibus modestus felle nullo perlitis,

20

Vini cibique abstemius,

Laetus, pudicus, pulcher in senio quoque, ut

Aquilae senectus aut equi.

Attius Patera pater rhetor V

metro iambico maior senario minor quaternario V mg.

codex unicus
V = Leiden, Bibliotheek der Rijksuniversiteit, VLF 111 (saec. IX)

carmina 16-22 in V, folio 12 abrepto, desunt; editiones antiquiores (Charpin, Vinet, Scaliger) codicum instar habendae sunt. Tantum carmina 20,7-14 et 25,7-10 extant in v = Wien, Österreichische Nationalbibliothek, lat. 3261 (saec. XVI) et s = Leiden, Bibliotheek der Rijksuniversiteit, Opera 754 F 9