Pastor nepos ex filio
Tu quoque maturos, puer immature, dolores
Irrumpis, maesti luctus acerbus aui,
Pastor, care nepos, spes cuius certa fuit res,
Hesperii patris tertia progenies.
5
Nomen, quod casus dederat, quia fistula primum
Pastorale melos concinuit genito,
Sero intellectum uitae breuis argumentum,
Spiritus afflatis quod fugit e calamis.
Occidis emissae percussus pondere testae,
10
Abiecit tecto quam manus artificis.
Non fuit artificis manus haec: manus illa cruenti
Certa fuit fati, suppositura reum.
Heu, quae uota mihi, quae rumpis gaudia, Pastor!
Illa meum petiit tegula missa caput.
15
Dignior o nostrae gemeres qui fata senectae
Et quererere meas maestus ad exsequias.
2
Irrumpis V
en rumpis Heinsius ap. Schenkl
erumpis Schenkl
interrumpisti Peiper
codex unicus
V = Leiden, Bibliotheek der Rijksuniversiteit, VLF 111 (saec. IX)