Ausonius Parentalia 8 = XV.10 Schenkl = IV.8 Peiper = III.8 Prete = VI.1.8 Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


Attusius Lucanus Talisius socer

Qui proceres ueteremque uolet celebrare senatum

      Claraque ab exortu stemmata Burdigalae,

Teque tuumque genus memoret, Lucane Talisi,

      Moribus ornasti qui ueteres proauos.

5

Pulcher honore oris, tranquillo pectore comis,

     Facundo ciuis maior ab ingenio;

Venatu et ruris cultu uictusque nitore

      Omne aeuum peragens, publica despiciens;

Nosci inter primos cupiens, prior esse recusans,

10

      Ipse tuo uiuens segregus arbitrio.

Optabas tu me generum florente iuuenta:

      Optare hoc tantum, non et habere datum.

Vota probant superi meritisque fauentia sanctis

      Implent fata, uiri quod uoluere boni.

15

Et nunc perpetui sentis sub honore sepulchri,

     Quam reuerens natae quamque tui maneam.

Caelebs namque gener haec nunc pia munera soluo:

     Nam et caelebs numquam desinam et esse gener.

6

ciuis V Lolli inter cruces

quivis Schenkl

quamvis Peiper, Combeaud

quovis Brandes 1876, Prete

cui vis Pichon

aequaevis Green

codex unicus
V = Leiden, Bibliotheek der Rijksuniversiteit, VLF 111 (saec. IX)