Aemilia Hilaria matertera
Tuque gradu generis matertera, sed uice matris
Affectu nati commemoranda pio,
Aemilia, in cunis Hilari cognomen adepta
Quod laeta et pueri comis ad effigiem;
5
Reddebas uerum non dissimulanter ephebum,
More uirum medicis artibus experiens.
Feminei sexus odium tibi semper, et inde
Creuit deuotae uirginitatis amor,
Quae tibi septenos nouies est culta per annos;
10
Quique aeui finis, ipse pudicitiae.
Haec, quia uti mater monitis et amore fouebas,
Supremis reddo filius exsequiis.