Ausonius Parentalia 4 = XV.6 Schenkl = IV.4 Peiper = III.4 Prete = VI.1.4 Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


Caecilius Argicius Arborius auus

Officiosa pium ne desere, pagina, munus;

      Maternum post hos commemoremus auum,

Arborium, Aeduico ductum de stemmate nomen,

      Complexum multas nobilitate domus,

5

Qua Lugdunensis prouincia quaque potentes

      Aedues Alpino quaque Vienna iugo.

Inuida sed nimium generique opibusque superbis

      Aerumna incubuit. namque auus et genitor

Proscripti, regnum cum Victorinus haberet

10

     Victor et in Tetricos reccidit imperium.

Tum profugum in terris, per quas erumpit Aturrus

      Tarbellique furor perstrepit Oceani,

Grassantis dudum Fortunae tela pauentem

      Pauperis Aemiliae condicio implicuit.

15

Mox tenuis multo quaesita pecunia nisu

     Solamen fesso, non et opes, tribuit.

Tu caeli numeros et conscia sidera fati

      Callebas, studium dissimulanter agens.

Non ignota tibi nostrae quoque formula uitae,

20

      Signatis quam tu condideras tabulis,

Prodita non umquam, sed matris cura retexit

     Sedula quod timidi cura tegebat aui.

Tu nouies denos uitam cum duxeris annos,

      Expertus Fortis tela cauenda deae,

25

Amissum flebas post trina decennia natum

     Saucius - hoc laeuo lumine cassus eras -

Dicebas sed te solacia longa fouere,

      Quod mea praecipuus fata maneret honos.

Et modo conciliis animarum mixte priorum

30

      Fata tui certe nota nepotis habes.

Sentis quod quaestor, quod te praefectus, et idem

      Consul honorifico munere commemoro.

10

Victor V Schenkl inter cruces, Green inter cruces

ductor Peiper

raptor Combeaud

codex unicus
V = Leiden, Bibliotheek der Rijksuniversiteit, VLF 111 (saec. IX)