Ausonius Parentalia praefatio = XV.2 Schenkl = IV Peiper = III Prete = VI.1 b Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


Item praefatio uersibus adnotata

Nomina carorum iam condita funere iusto,

      Fleta prius lacrimis, nunc memorabo modis,

Nuda, sine ornatu, fandique carentia cultu:

     Sufficit inferiis exsequialis honos.

5

Nenia, funereis satis officiosa querellis,

     Annua ne tacitus munera praetereas

Quae Numa cognatis sollemnia dedicat umbris,

     Vt gradus aut mortis postulat aut generis.

Hoc satis et tumulis, satis et telluris egenis:

10

      Voce ciere animas funeris instar habet.

Gaudent compositi cineres sua nomina dici;

      Frontibus hoc scriptis et monumenta iubent.

Ille etiam, maesti cui defuit urna sepulchri,

      Nomine ter dicto paene sepultus erit.

15

At tu, quicumque es, lector, qui fata meorum

      Dignaris maestis commemorare elegis,

Inconcussa tuae percurras tempora uitae

      Et praeter iustum funera nulla fleas.

Item praefatio uersibus adnotata V

codex unicus
V = Leiden, Bibliotheek der Rijksuniversiteit, VLF 111 (saec. IX)