Praefatio in prosa
Scio uersiculis meis euenire ut fastidiose legantur: quippe sic meritum est eorum. sed quosdam solet commendare materia et aliquotiens fortasse lectorem solum lemma sollicitat tituli, ut festiuitate persuasus et ineptiam ferre contentus sit. hoc opusculum nec materia amoenum est nec appellatione iucundum. habet maestam religionem qua carorum meorum obitus tristi affectione commemoro. titulus libelli est Parentalia. antiquae appellationis hic dies et iam inde ab Numa cognatorum inferiis institutus: nec quicquam sanctius habet reuerentia superstitum quam ut amissos uenerabiliter recordetur.
tituli V del. Combeaud glossam esse putans
codex unicus
V = Leiden, Bibliotheek der Rijksuniversiteit, VLF 111 (saec. IX)