***
1
Quadrupedum et uolucrum, uel cum terrena marinis
Monstra admiscentur, donec purgantibus euris
Difflatae liquidum tenuentur in aera nubes.
Nunc fora, nunc lites, lati modo pompa theatri
5
Visitur, et turmas equitum caedesque latronum
Perpetior; lacerat nostros fera belua uultus
Aut in sanguinea gladio grassamur harena.
Per mare nauifragum gradior pedes et freta cursu
Transilio et subitis uolito super aera pinnis.
17
Cerno triumphantes inter me plaudere; rursum
Inter captiuos trahor exarmatus Alanos.
Templa deum sanctasque fores palatiaque aurea
20
Specto et Sarrano uideor discumbere in ostro
21
Et mox fumosis conuiua accumbo popinis.
10
Infandas etiam ueneres incestaque noctis
Dedecora et tragicos patimur per somnia coetus.
Perfugium tamen est, quotiens portenta soporum
Soluit rupta pudore quies et imagine foeda
Libera mens uigilat; totum bene conscia lectum
15
Pertractat secura manus, probrosa recedit
Culpa tori et profugi uanescunt crimina somni.
22
Diuinum perhibent uatem sub frondibus ulmi
Vana ignauorum simulacra locasse soporum
Et geminas numero portas: quae fornice eburno
25
Semper fallaces glomerat super aera formas,
Altera quae ueros emittit cornea uisus.
Quod si de dubiis conceditur optio nobis,
Deesse fidem laetis melius quam uana timeri.
Ecce ego iam malim falli; nam dummodo semper
30
Tristia uanescant, potius caruisse fruendis
Quam trepidare malis. satis est bene, si metus absit.
Sunt et qui fletus et gaudia controuersum
Coniectent uarioque trahant euenta relatu.
Ite per obliquos caeli, mala somnia, mundos,
35
Irrequieta uagi qua difflant nubila nimbi,
Lunares habitate polos; quid nostra subitis
Limina et angusti tenebrosa cubilia tecti?
Me sinite ignauas placidum traducere noctes,
Dum redeat roseo mihi Lucifer aureus ortu.
40
Quod si me nullis uexatum nocte figuris
Mollis tranquillo permulserit aere somnus,
Hunc lucum, nostro uiridis qui frondet in agro
Vlmeus, excubiis habitandum dedico uestris.
1
Ante v. 1 lacunam indicavit Charpin
codex unicus
V = Leiden, Bibliotheek der Rijksuniversiteit, VLF 111 (saec. IX)