Ausonius Drepanio filio
"Cui dono lepidum nouum libellum?"
Veronensis ait poeta quondam
Inuentoque dedit statim Nepoti.
At nos illepidum rudem libellum,
5
Burras quisquilias ineptiasque,
Credemus gremio cui fouendum?
Inueni - trepidae silete nugae -
Nec doctum minus et magis benignum
Quam quem Gallia praebuit Catullo.
10
Hoc nullus mihi carior meorum,
Quem pluris faciunt nouem sorores
Quam cunctos alios Marone dempto.
"Pacatum haud dubie, poeta, dicis?"
Ipse est. intrepide uolate, uersus,
15
Et nidum in gremio fouete tuto.
Hic uos diligere, hic uolet tueri;
Ignoscenda teget, probata tradet.
Post hunc iudicium timete nullum.
Vale.
4
rudem Poelman
rude V
codex unicus
V = Leiden, Bibliotheek der Rijksuniversiteit, VLF 111 (saec. IX)
in V hoc carmen fol. 15r-v extat inter Epitaphia et Eclogam 19; Green unus inter Praefationes posuit