Theodosio Augusto Ausonius salutem
Agricolam si flaua Ceres dare semina terrae,
Gradiuus iubeat si capere arma ducem,
Soluere de portu classem Neptunus inermem,
Fidere tam fas est quam dubitare nefas,
5
Insanum quamuis hiemet mare crudaque tellus
Seminibus, bello nec satis apta manus.
Nil dubites auctore bono. mortalia quaerunt
Consilium, certus iussa capesse dei.
Scribere me Augustus iubet et mea carmina poscit
10
Paene rogans; blando uis latet imperio.
Non habeo ingenium, Caesar sed iussit - habebo.
Cur me posse negem, posse quod ille putat?
Inualidas uires ipse excitat et iuuat idem
Qui iubet: obsequium sufficit esse meum.
15
Non tutum renuisse deo; laudata pudoris
Saepe mora est, quotiens contra parem dubites.
Quin etiam non iussa parant erumpere dudum
Carmina: quis nolit Caesaris esse liber,
Ne ferat indignum uatem centumque lituras,
20
Mutandas semper deteriore nota?
Tu modo te iussisse, pater Romane, memento
Inque meis culpis da tibi tu ueniam.
Theodosio Augusto Ausonius salutem H
Theudosio Ausonius V
Domino meo et omnium Theodosium Augusto. Ausonius tuus P
codices
V = Leiden, Bibliotheek der Rijksuniversiteit, VLF 111 (saec. IX)
P = Paris, Bibliothèque Nationale de France, lat. 8500 (saec. XIV)
H = London, British Library, Harley 2613 (1460-1470)