Ambrosius Mediolanensis hymni 15

Altre sezioni


Aeterna Christi munera

Et martyrum uictorias,

Laudes ferentes debitas,

Laetis canamus mentibus.

5

Ecclesiarum principes,

Belli triumphales duces,

Caelestis aulae milites

Et uera mundi lumina,

Terrore uicto saeculi

10

Poenisque spretis corporis,

Mortis sacrae conpendio

Lucem beatam possident.

Traduntur igni martyres

Et bestiarum dentibus:

15

Armata saeuit ungulis

Tortoris insani manus.

Nudata pendent uiscera,

Sanguis sacratus funditur,

Sed permanent inmobiles

20

Vitae perennis gratia.

Deuota sanctorum fides,

Inuicta spes credentium,

Perfecta Christi caritas

Mundi triumphat principem.

25

In his paterna gloria,

In his uoluntas Spiritus,

Exultat in his Filius:

Caelum repletur gaudio.

Te nunc, redemptor, quaesumus,

30

Vt martyrum consortio

Iungas precantes seruulos

In sempiterna saecula.