Ambrosius Mediolanensis hymni 13

Altre sezioni


Apostolorum passio

Diem sacrauit saeculi,

Petri triumphum nobilem,

Pauli coronam praeferens.

5

Coniunxit aequales uiros

Cruor triumphalis necis,

Deum secutos praesulem

Christi coronauit fides.

Primus Petrus apostolus,

10

Nec Paulus inpar gratia;

Electionis uas sacrae,

Petri adaequauit fidem.

Verso crucis uestigio

Simon honorem dans Deo

15

Suspensus ascendit, dati

Non inmemor oraculi.

Praecinctus, ut dictum est, senex

Et eleuatus ab altero

Quo nollet iuit, sed uolens

20

Mortem subegit asperam.

Hinc Roma celsum uerticem

Deuotionis extulit,

Fundata tali sanguine

Et uate tanto nobilis.

25

Tantae per urbis ambitum

Stipata tendunt agmina,

Trinis celebratur uiis

Festum sacrorum martyrum.

Prodire quis mundum putet,

30

Concurrere plebem poli:

Electa gentium caput,

Sedes magistri gentium.