Apostolorum supparem
Laurentium archidiaconem
Pari corona martyrum
Romana sacrauit fides.
5
Xystum sequens hic martyrem
Responsa uatis rettulit:
"Maerere, fili, desine,
Sequere me post triduum."
Nec territus poenae metu
10
Heres futurus sanguinis
Spectauit obtutu pio,
Quod ipse mox persoluerat.
Iam tunc in illo martyre
Egit triumphum martyris,
15
Successor aequus syngraphum
Vocis tenens et sanguinis.
Post triduum iussus tamen
Census sacratos prodere
Spondet pie nec abnuit,
20
Addens dolum uictoriae.
Spectaculum pulcherrimum!
Egena cogit agmina
Inopesque monstrans praedicat:
"Hi sunt opes ecclesiae."
25
Vere piorum perpetes
Inopes profecto sunt opes.
Auarus inlusus dolet
Flammas et ultrices parat.
Fugit perustus carnifex
30
Suisque cedit ignibus:
"Versate me," martyr uocat,
"Vorate, si coctum est," iubet.