Grates tibi, Iesu, nouas
Noui repertor muneris
Protasio Geruasio
Martyribus inuentis cano.
5
Piae latebant hostiae,
Sed non latebat fons sacer:
Latere sanguis non potest,
Qui clamat ad Deum patrem.
Caelo refulgens gratia
10
Artus reuelauit sacros:
Nequimus esse martyres,
Sed repperimus martyres.
Hic quis requirat testium
Voces, ubi factum est fides?
15
Sanatus inpos mentium
Opus fatetur martyrum.
Caecus recepto lumine
Mortis sacrae meritum probat:
Seuerus est nomen uiro,
20
Vsus minister publici.
Vt martyrum uestem attigit
Et ora tersit nubila,
Lumen refulsit ilico
Fugitque pulsa caecitas.
25
Soluta turba uinculis,
Spiris draconum libera,
Emissa totis urbibus
Domum redit cum gratia.
Vetusta saecla uidimus,
30
Iactata semicinctia,
Tactuque et umbra corporum
Aegris salutem redditam.