Agnes beatae uirginis
Natalis est, quo spiritum
Caelo refudit debitum
Pio sacrata sanguine.
5
Matura martyrio fuit,
Matura nondum nuptiis.
Nutabat in uiris fides,
Cedebat effessus senex.
Metu parentes territi
10
Claustrum pudoris auxerant:
Soluit fores custodiae
Fides teneri nescia
Prodire quis nuptum putet,
(Sic laeta uultu ducitur),
15
Nouas uiro ferens opes,
Dotata censu sanguinis.
Aras nefandi numinis
Adolere taedis cogitur:
Respondet "haud tales faces
20
Sumpsere Christi uirgines:
Hic ignis exstinguit fidem,
Haec flamma lumen eripit.
Hic, hic ferite! ut profluo
Cruore restinguam focos."
25
Percussa quam pompam tulit!
Nam ueste se totam tegens
Curam pudoris praestitit,
Ne quis retectam cerneret.
In morte uiuebat pudor,
30
Vultumque texerat manu,
Terram genu flexo petit
Lapsu uerecundo cadens.