Intende, qui regis Israel,
Super cherubin qui sedes,
Adpare Ephrem coram, excita
Potentiam tuam et ueni.
5
Veni, redemptor gentium,
Ostende partum uirginis,
Miretur omne saeculum,
Talis decet partus Deo.
Non ex uirili semine,
10
Sed mystico spiramine
Verbum Dei factum est caro,
Fructusque uentris floruit.
Aluus tumescit uirginis,
Claustrum pudoris permanet,
15
Vexilla uirtutum micant,
Versatur in templo Deus.
Procedat e thalamo suo,
Pudoris aula regia,
Geminae gigans substantiae;
20
Alacris occurrat uiam.
Egressus eius a Patre,
Regressus eius ad Patrem,
Excursus usque ad inferos,
Recursus ad sedem Dei.
25
Aequalis aeterno Patri
Carnis tropaeo accingere,
Infirma nostri corporis
Virtute firmans perpeti.
Praesepe iam fulget tuum
30
Lumenque nox spirat nouum,
Quod nulla nox interpolet
Fideque iugi luceat.