Deus creator omnium,
Polique rector, uestiens
Diem decoro lumine,
Noctem soporis gratia,
5
Artus solutos ut quies
Reddat laboris usui,
Mentesque fessas alleuet
Luctusque soluat anxios,
Grates peracto iam die
10
Et noctis exortu preces,
Voti reos ut adiuues,
Hymnum canentes soluimus.
Te cordis ima concinant,
Te uox canora concrepet,
15
Te diligat castus amor,
Te mens adoret sobria:
Vt cum profunda clauserit
Diem caligo noctium,
Fides tenebras nesciat
20
Et nox fide reluceat.
Dormire mentem ne sinas,
Dormire culpa nouerit,
Castis fides refrigerans
Somni uaporem temperet.
25
Exuta sensu lubrico
Te cordis ima somnient,
Nec hostis inuidi dolo
Pauor quietos suscitet.
Christum rogemus et Patrem,
30
Christi Patrisque Spiritum,
Vnum potens per omnia,
Foue precantes, Trinitas.