Iam surgit hora tertia,
Qua Christus ascendit crucem;
Nil insolens mens cogitet,
Intendat affectum precis.
5
Qui corde Christum suscipit,
Innoxium sensum gerit,
Votisque praestat sedulis
Sanctum mereri Spiritum.
Haec hora, quae finem dedit
10
Diri ueterno criminis,
Mortisque regnum diruit
Culpamque ab aeuo sustulit.
Hinc iam beata tempora
Coepere Christi gratia,
15
Fidei repleuit ueritas
Totum per orbem ecclesias.
Celso triumphi uertice
Matri loquebatur suae:
"En filius, mater, tuus,"
20
Apostolo "en mater tua,"
Praetenta nuptae foedera
Alto docens mysterio,
Ne uirginis partus sacer
Matris pudorem laederet.
25
Cui fidem caelestibus
Iesus dedit miraculis,
Nec credidit plebs impia:
Qui credidit saluus erit.
Nos credimus natum Deum
30
Partumque uirginis sacrae,
Peccata qui mundi tulit
Ad dexteram sedens Patris.