Damasus epigrammata 68

Testo base di riferimento: M. Ihm, 1895

Cura dell'edizione digitale: P. Tomasi, 2010

Altre sezioni


DE SALVATORE

Christe potens rerum, redeuntis conditor aeui.

Vox summi sensusque dei, quem fudit ab alta

Mente pater tantique dedit consortia regni,

Impia qui nostrae domuisti crimina uitae

5

Passus corporea mundum uestire figura

Affarique palam populos hominemque fateri.

<quemque utero inclusum Mariae mox numine uiso>

Virginei tumuere sinus innuptaque mater

Arcano stupuit compleri uiscera partu

10

Auctorem paritura suum: mortalia corda

Artificem texere poli mundique repertor

Pars fuit humani generis latuitque sub uno

Pectore, qui totum late complectitur orbem,

Et qui non spatiis terrae, non aequoris unda

15

Nec capitur caelo, paruos confluxit in artus.

Quin et supplicii nomen nexusque subisti,

Vt nos subriperes leto mortemque fugares

Morte tua, mox aetherias euectus in auras

Purgata repetens laetum tellure parentem.

20

Augustum foueas, festis ut saepe diebus

Annua sinceri celebret ieiunia sacri.

4

qui Fab. tu