Blanditias fera Mors Veneris persensit amando,

      Permisit solitae nec Styga tristitiae.

Tristitiae Styga nec solitae permisit, amando

      Persensit Veneris Mors fera blanditias.

5

Omnipotens pater huic semper concessit amori,

      Fecit nec requiem tot sibi fulminibus.

Fulminibus sibi tot requiem nec fecit, amori

      Concessit semper huic pater omnipotens.

Purpureus tibi flos uultum non pingit, Iacche,

10

      Monstrat nec mitem frons noua laetitiam.

Laetitiam noua frons mitem nec monstrat, Iacche,

      Pingit non uultum flos tibi purpureus.

Occubuit minor hic fractis et uiribus aestu

      Torpuit oppressus Amphitryoniades.

15

Amphitryoniades oppressus torpuit aestu,

      Viribus et fractis hic minor occubuit.

Incaluit iubar hoc externis ignibus ardens

      Fortius; ardorem Sol sibi congeminat.

Congeminat sibi Sol ardorem; fortius ardens

20

      Ignibus externis hoc iubar incaluit.

Deposita face Nox quaesiuit lumina Phoebes,

      Vulnere sed blandus haec tenet Endymion.

Endymion tenet haec blandus sed uulnere, Phoebes

      Lumina quaesiuit Nox face deposita.

25

Armipotens deus hoc suspirat pondere, uulnus

      Ferrea nec rabies aut furor exsuperat.

Exsuperat furor aut rabies nec ferrea uulnus,

      Pondere suspirat hoc deus armipotens.

Impatiens Venus est, siluas dum lustrat Adonis,

30

      Carpit si Martem, iam cui conueniat?

Conueniat cui iam, Martem si carpit? Adonis

      Lustrat dum siluas, est Venus impatiens.