Omnipotens, annosa poli quem suspicit aetas,
Quem sub millenis semper uirtutibus unum
Nec numero quisquam poterit pensare nec aeuo,
Nunc esto affatus, si quo te nomine dignum est,
5
Quo sacer ignoto gaudes, quod maxima tellus
Intremit et sistunt rapidos uaga sidera cursus.
Tu solus, tu multus item, tu primus et idem
Postremus mediusque simul mundique superstes.
Nam sine fine tui labentia tempora finis,
10
Altus ab aeterno spectans fera turbine certo
Rerum fata rapi uitasque inuoluier aeuo
Atque iterum reduces supera in conuexa referri,
Scilicet ut mundo redeat quod partibus haustum
Perdiderit refluumque iterum per tempora fiat,
15
Tu (siquidem fas est in temet tendere sensum
Et speciem temptare sacram, qua sidera cingis
Immensus longamque simul complecteris aethram)
Fulmineis forsan rapida sub imagine membris
Flammifluum quoddam iubar es, quo cuncta coruscans
20
Ipse uides nostrumque premis solemque diemque.
Tu genus omne deum, tu rerum causa uigorque,
Tu natura omnis, deus innumerabilis unus,
Tu sexu plenus toto, tibi nascitur olim
Hic deus, hic mundus, domus hic hominumque deumque,
25
Lucens, augusto stellatus flore iuuentae.
Quem (precor, aspires), qua sit ratione creatus,
Quo genitus factusue modo, da nosse uolenti;
Da, Pater, augustas ut possim noscere causas,
Mundanas olim moles quo foedere rerum
30
Sustuleris animamque leui quo maximus olim
Texueris numero, quo congrege dissimilique,
Quicquid id est uegetum, quod per cita corpora uiuit.