Pentadius carmina (anth. Riese) 235

Altre sezioni


Sentio, fugit hiems; Zephyrisque animantibus orbem

      Iam tepet Eurus aquis. sentio, fugit hiems.

Parturit omnis ager, persentit terra calores

      Germinibusque nouis parturit omnis ager.

5

Laeta uirecta tument, foliis sese induit arbor,

      Vallibus apricis laeta uirecta tument.

Iam Philomela gemit modulis, Ityn impia mater

      Oblatum mensis iam Philomela gemit.

Monte tumultus aquae properat per laeuia saxa

10

      Et late resonat monte tumultus aquae.

Floribus innumeris pingit sola flatus Eoi

      Tempeaque exhalant floribus innumeris.

Per caua saxa sonat pecudum mugitibus Echo

      Bisque repulsa iugis per caua saxa sonat.

15

Vitea musta tument uicinas iuncta per ulmos;

      Fronde maritata uitea musta tument.

Nota tigilla linit iam garrula luce chelidon;

      Dum recolit nidos, nota tigilla linit.

Sub platano uiridi iucundat somnus in umbra,

20

      Sertaque texuntur sub platano uiridi.

Tunc quoque dulce mori, tunc fila recurrite fusis,

      Inter et amplexus tunc quoque dulce mori.