Optatianus Porfyrius carmina 7

Other sections


Augustum specimen, mitis clementia, magne

Ausonidum ductor, tua, maxime, fortia Musae

Castaliae de fonte canunt. tu munera summa

Votorum da, Phoebe, mihi nunc, plena fauoris,

5

Da mentem sensusque pios insigne serenus

Imperium, natisque potens, ad Martia felix,

Perpetuum saeclis, picto sub carmine fari.

Audentem, precor, ipse iuua me, gloria uatum,

Dicturum carmen, quamuis nunc copia Musae

10

Non talis, possitque minus sub lege iuuari:

Versu aliud limo, aliud, quo pagina in omnis

Signatur modulos, discernat semita fandi.

Velle iubet numen, lux alma, et gaudia mundi

Instituunt; sequitur curas in musica uoto

15

Virtutesque tuas et mores pandere gestit,

Sancte, tuos. creuit nostrae fiducia menti;

Te duce namque pio gaudens sub munere nota

In iuga festinat Musis, ubi frondea semper

Tecta canunt artes et notae uatibus undae.

20

Indomitos reges seu pacis lubrica uictor

Aut bello sternens aut mitis foedere, nutu

Esse tuos facis agrosque exercere tuorum.

Auctior alma dei per te praesentia mundum

Respexit, reddens mox aurea saecula rebus,

25

Ostenditque deus rectoris tempora iusti

Aetherio nutu placidis clementia iussis.

Per te perque tuos sunt omnia mitia, uictor,

Natos, res populi florent ad gaudia mentis,

Caesaribusque tuis toto Victoria in orbe

30

Semper iure comes felix in saecula pollet.

Tantorum merita statues captiua tropaea,

Victor Sarmatiae totiens. en, accipe, clare

Ductor, ubique tuis uotorum reddita, felix,

Debita. iam compos gaudet tua, Romule, pubes:

35

Rector rite suus nobis per saecula floret.