Martialis epigrammata 13, 2

Altre sezioni


Nasutus sis usque licet, sis denique nasus,

      Quantum noluerat ferre rogatus Atlans,

Et possis ipsum tu deridere Latinum:

      Non potes in nugas dicere plura meas

5

Ipse ego quam dixi. quid dentem dente iuuabit

      Rodere? carne opus est, si satur esse uelis.

Ne perdas operam: qui se mirantur, in illos

      Virus habe, nos haec nouimus esse nihil.

Non tamen hoc nimium nihil est, si candidus aure

10

      Nec matutina si mihi fronte uenis.