Bis quinquagenis domus est tibi milibus empta,
Vendere quam summa uel breuiore cupis.
Arte sed emptorem uafra corrumpis, Amoene,
Et casa diuitiis ambitiosa latet.
5
Gemmantes prima fulgent testudine lecti
Et Maurusiaci pondera rara citri;
Argentum atque aurum non simplex Delphica portat;
Stant pueri dominos quos precer esse meos.
Deinde ducenta sonas et ais non esse minoris.
10
Instructam uili uendis, Amoene, domum.