Sexagena teras cum limina mane senator,
Esse tibi uideor desidiosus eques,
Quod non a prima discurram luce per urbem
Et referam lassus basia mille domum.
5
Sed tu, purpureis ut des noua nomina fastis
Aut Nomadum gentes Cappadocumue petas:
At mihi, quem cogis medios abrumpere somnos
Et matutinum ferre patique lutum,
Quid petitur? rupta cum pes uagus exit aluta
10
Et subitus crassae decidit imber aquae
Nec uenit ablatis clamatus uerna lacernis,
Accedit gelidam seruus ad auriculam,
Et "rogat ut secum cenes Laetorius" inquit.
Viginti nummis? non ego: malo famem
15
Quam sit cena mihi, tibi sit prouincia merces,
Et faciamus idem nec mereamur idem.