Quare tam multis a te, Laetine, diebus
Non abeat febris quaeris et usque gemis.
Gestatur tecum pariter tecumque lauatur;
Cenat boletos, ostrea, sumen, aprum;
5
Ebria Setino fit saepe et saepe Falerno
Nec nisi per niueam Caecuba potat aquam;
Circumfusa rosis et nigra recumbit amomo
Dormit et in pluma purpureoque toro.
Cum recubet pulchre, cum tam bene uiuat apud te,
10
Ad Damam potius uis tua febris eat?