Martialis epigrammata 11, 49

Altre sezioni


Nulla est hora tibi qua non me, Phylli, furentem

      Despolies: tanta calliditate rapis.

Nunc plorat speculo fallax ancilla relicto,

      Gemma uel a digito uel cadit aure lapis;

5

Nunc furtiua lucri fieri bombycina possunt,

      Profertur Cosmi nunc mihi siccus onyx;

Amphora nunc petitur nigri cariosa Falerni,

      Expiet ut somnos garrula saga tuos;

Nunc ut emam grandemue lupum mullumue bilibrem,

10

      Indixit cenam diues amica tibi.

Sit pudor et tandem ueri respectus et aequi:

      Nil tibi, Phylli, nego; nil mihi, Phylli, nega.