Martialis epigrammata 11, 31

Altre sezioni


Atreus Caecilius cucurbitarum

Sic illas quasi filios Thyestae

In partes lacerat secatque mille.

Gustu protinus has edes in ipso,

5

Has prima feret alteraue cena.

Has cena tibi tertia reponet,

Hinc seras epidipnidas parabit.

Hinc pistor fatuas facit placentas,

Hinc et multiplices struit tabellas

10

Et notas caryotidas theatris.

Hinc exit uarium coco minutal,

Vt lentem positam fabamque credas;

Boletos imitatur et botellos,

Et caudam cybii breuesque maenas.

15

Hinc cellarius experitur artes,

Vt condat uario uafer sapore

In rutae folium Capelliana.

Sic inplet gabatas paropsidesque,

Et leues scutulas cauasque lances.

20

Hoc lautum uocat, hoc putat uenustum,

Vnum ponere ferculis tot assem.