Ferreus es, si stare potest tibi mentula, Flacce,
Cum te sex cyathos orat amica gari,
Vel duo frusta rogat cybii tenuemue lacertum
Nec dignam toto se botryone putat;
5
Cui portat gaudens ancilla paropside rubra
Allecem, sed quam protinus illa uoret;
Aut cum perfricuit frontem posuitque pudorem,
Sucida palliolo uellera quinque petit.
At mea me libram foliati poscat amica
10
Aut uirides gemmas sardonychasue pares,
Nec nisi prima uelit de Tusco Serica uico
Aut centum aureolos sic uelut aera roget.
Nunc tu uelle putas haec me donare puellae?
Nolo sed his ut sit digna puella uolo.