Non urbana mea tantum Pimpleide gaudent
Otia nec uacuis auribus ista damus,
Sed meus in Geticis ad Martia signa pruinis
A rigido teritur centurione liber,
5
Dicitur et nostros cantare Britannia uersus.
Quid prodest? nescit sacculus ista meus.
At quam uicturas poteramus pangere chartas
Quantaque Pieria proelia flare tuba,
Cum pia reddiderint Augustum numina terris,
10
Et Maecenatem si tibi, Roma, darent!