I nostro comes, i, libelle, Flauo
Longum per mare, sed fauentis undae,
Et cursu facili tuisque uentis
Hispanae pete Tarraconis arces:
5
Illinc te rota tollet et citatus
Altam Bilbilin et tuum Salonem
Quinto forsitan essedo uidebis.
Quid mandem tibi quaeris? ut sodales
Paucos, sed ueteres et ante brumas
10
Triginta mihi quattuorque uisos
Ipsa protinus a uia salutes
Et nostrum admoneas subinde Flauum
Iucundos mihi nec laboriosos
Secessus pretio paret salubri,
15
Qui pigrum faciant tuum parentem.
Haec sunt. iam tumidus uocat magister
Castigatque moras, et aura portum
Laxauit melior: uale, libelle:
Nauem, scis puto, non moratur unus.