Raros colligis hinc et hinc capillos
Et latum nitidae, Marine, caluae
Campum temporibus tegis comatis;
Sed moti redeunt iubente uento
5
Reddunturque sibi caputque nudum
Cirris grandibus hinc et inde cingunt:
Inter Spendophorum Telesphorumque
Cydae stare putabis Hermerotem.
Vis tu simplicius senem fateri,
10
Vt tandem uidearis unus esse?
Caluo turpius est nihil comato.