Ibis litoreas, Macer, Salonas,
Ibit rara fides amorque recti
Et quae, cum comitem trahit pudorem,
Semper pauperior redit potestas:
5
Felix auriferae colone terrae,
Rectorem uacuo sinu remittes
Optabisque moras, et exeuntem
Vdo Dalmata gaudio sequeris.
Nos Celtas, Macer, et truces Hiberos
10
Cum desiderio tui petemus.
Sed quaecumque tamen feretur illinc
Piscosi calamo Tagi notata,
Macrum pagina nostra nominabit:
Sic inter ueteres legar poetas,
15
Nec multos mihi praeferas priores,
Vno sed tibi sim minor Catullo.