Littera facundi gratum mihi pignus amici
Pertulit, Ausoniae dona seuera togae,
Qua non Fabricius, sed uellet Apicius uti,
Vellet Maecenas Caesarianus eques.
5
Vilior haec nobis alio mittente fuisset;
Non quacumque manu uictima caesa litat:
A te missa uenit: possem nisi munus amare,
Marce, tuum, poteram nomen amare meum.
Munere sed plus est et nomine gratius ipso
10
Officium docti iudiciumque uiri.