Anxuris aequorei placidos, Frontine, recessus
Et propius Baias litoreamque domum,
Et quod inhumanae cancro feruente cicadae
Non nouere nemus, flumineosque lacus
5
Dum colui, doctas tecum celebrare uacabat
Pieridas; nunc nos maxima Roma terit.
Hic mihi quando dies meus est? iactamur in alto
Vrbis, et in sterili uita labore perit,
Dura suburbani dum iugera pascimus agri
10
Vicinosque tibi, sancte Quirine, lares.
Sed non solus amat qui nocte dieque frequentat
Limina nec uatem talia damna decent.
Per ueneranda mihi Musarum sacra, per omnes
Iuro deos: et non officiosus amo.