Sidera iam Tyrius Phrixei respicit agni
Taurus et alternum Castora fugit hiems;
Ridet ager, uestitur humus, uestitur et arbor,
Ismarium paelex Attica plorat Ityn.
5
Quos, Faustine, dies, quales tibi Roma *Rauennae*
Abstulit! o soles, o tunicata quies!
O nemus, o fontes solidumque madentis harenae
Litus et aequoreis splendidus Anxur aquis,
Et non unius spectator lectulus undae,
10
Qui uidet hinc puppes fluminis, inde maris!
Sed nec Marcelli Pompeianumque, nec illic
Sunt triplices thermae nec fora iuncta quater,
Nec Capitolini summum penetrale Tonantis
Quaeque nitent caelo proxima templa suo.
15
Dicere te lassum quotiens ego credo Quirino:
"Quae tua sunt, tibi habe: quae mea, redde mihi".