Quinte Caledonios Ouidi uisure Britannos
Et uiridem Tethyn Oceanumque patrem,
Ergo Numae colles et Nomentana relinquis
Otia nec retinet rusque focusque senem?
5
Gaudia tu differs, at non et stamina differt
Atropos atque omnis scribitur hora tibi.
Praestiteris caro- quis non hoc laudet?- amico
Vt potior uita sit tibi sancta fides;
Sed reddare tuis tandem mansure Sabinis
10
Teque tuas numeres inter amicitias.