Martialis epigrammata 10, 35

Altre sezioni


Omnes Sulpiciam legant puellae

Vni quae cupiunt uiro placere;

Omnes Sulpiciam legant mariti

Vni qui cupiunt placere nuptae.

5

Non haec Colchidos adserit furorem,

Diri prandia nec refert Thyestae;

Scyllam, Byblida nec fuisse credit:

Sed castos docet et probos amores,

Lusus, delicias facetiasque.

10

Cuius carmina qui bene aestimarit,

Nullam dixerit esse nequiorem,

Nullam dixerit esse sanctiorem.

Tales Egeriae iocos fuisse

Vdo crediderim Numae sub antro.

15

Hac condiscipula uel hac magistra;

Esses doctior et pudica, Sappho:

Sed tecum pariter simulque uisam

Durus Sulpiciam Phaon amaret.

Frustra: namque ea nec Tonantis uxor

20

Nec Bacchi nec Apollinis puella

Erepto sibi uiueret Caleno.