Martialis epigrammata 9, 101

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


Appia, quam simili uenerandus in Hercule Caesar

      Consecrat, Ausoniae maxima fama uiae,

Si cupis Alcidae cognoscere facta prioris,

     Disce: Libyn domuit raraque poma tulit,

5

Peltatam Scythico discinxit Amazona nodo,

      Addidit Arcadio terga leonis apro,

Aeripedem siluis ceruum, Stymphalidas astris

      Abstulit, a Stygia cum cane uenit aqua,

Fecundam uetuit reparari mortibus hydram,

10

      Hesperias Tusco lauit in amne boues.

Haec minor Alcides: maior quae gesserit audi,

      Sextus ab Albana quem colit arce lapis.

Adseruit possessa malis Palatia regnis,

      Prima suo gessit pro Ioue bella puer;

15

Solus Iuleas cum iam retineret habenas,

      Tradidit inque suo tertius orbe fuit;

Cornua Sarmatici ter perfida contudit Histri,

      Sudantem Getica ter niue lauit equum;

Saepe recusatos parcus duxisse triumphos

20

      Victor Hyperboreo nomen ab orbe tulit;

Templa deis, mores populis dedit, otia ferro,

     Astra suis, caelo sidera, serta Ioui.

Herculeum tantis numen non sufficit actis:

      Tarpeio deus hic commodet ora patri.

4

raraque β

aurea γ  Cfr. Sen. Ag. 852 arborque pomis fertilis aureis; Ven. Fort. carm. VI 7, 4 excipiunt oculos aurea poma meos; Hugo Mat. milit. V 148 cum furit Ypomenes aurea poma gerens