Alcide, Latio nunc agnoscende Tonanti,
Postquam pulchra dei Caesaris ora geris,
Si tibi tunc isti uultus habitusque fuissent,
Cesserunt manibus cum fera monstra tuis:
5
Argolico famulum non te seruire tyranno
Vidissent gentes saeuaque regna pati,
Sed tu iussisses Eurysthea; nec tibi fallax
Portasset Nessi perfida dona Lichas,
Oetaei sine lege rogi securus adisses
10
Astra patris summi, quae tibi poena dedit;
Lydia nec dominae traxisses pensa superbae
Nec Styga uidisses Tartareumque canem.
Nunc tibi Iuno fauet, nunc te tua diligit Hebe;
Nunc te si uideat Nympha, remittet Hylan.
3
fuissent β
fuisset γ