Si mihi Picena turdus palleret oliua,
Tenderet aut nostras silua Sabina plagas,
Aut crescente leuis traheretur harundine praeda
Pinguis et implicitas uirga teneret auis:
5
Cara daret sollemne tibi cognatio munus
Nec frater nobis nec prior esset auus.
Nunc sturnos inopes fringillorumque querelas
Audit et arguto passere uernat ager;
Inde salutatus picae respondet arator,
10
Hinc prope summa rapax miluus astra uolat.
Mittimus ergo tibi paruae munuscula chortis,
Qualia si recipis, saepe propinquus eris.