Cum comes Arctois haereret Caesaris armis
Velius, hanc Marti pro duce uouit auem;
Luna quater binos non tota peregerat orbes,
Debita poscebat iam sibi uota deus:
5
Ipse suas anser properauit laetus ad aras
Et cecidit sanctis hostia parua focis.
Octo uides patulo pendere nomismata rostro
Alitis? Haec extis condita nuper erant:
Quae litat argento pro te, non sanguine, Caesar,
10
Victima iam ferro non opus esse docet.