Martialis epigrammata 9, 29

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


Saecula Nestoreae permensa, Philaeni, senectae

     Rapta es ad infernas tam cito Ditis aquas?

Euboicae nondum numerabas longa Sibyllae

      Tempora: maior erat mensibus illa tribus.

5

Heu quae lingua silet! non illam mille catastae

     Vincebant, nec quae turba Sarapin amat,

Nec matutini cirrata caterua magistri,

      Nec quae Strymonio de grege ripa sonat

Quae nunc Thessalico lunam deducere rhombo,

10

      Quae sciet hos illos uendere lena toros?

Sit tibi terra leuis mollique tegaris harena,

      Ne tua non possint eruere ossa canes.

2

tam T γ

nam β